धृतराष्ट्र उवाच |
धर्मक्षेत्रे कुरुक्षेत्रे समवेता युयुत्सवः |
मामकाः पाण्डवाश्चैव किमकुर्वत सञ्जय ||1||
Dhṛitarāṣhṭra uvācha |
Dharmakṣhetre kurukṣhetre samavetā yuyutsavaḥ |
Māmakāḥ pāṇḍavāśhchaiva kimakurvata sañjaya ||1||
सञ्जय उवाच ।
दृष्ट्वा तु पाण्डवानीकं व्यूढं दुर्योधनस्तदा ।
आचार्यमुपसङ्गम्य राजा वचनमब्रवीत् ।। 2।।
Sañjaya uvācha |
Dṛiṣṭvā tu pāṇḍavānīkaṁ vyūḍhaṁ duryodhanas tadā |
Āchāryam upasaṅgamya rājā vachanam abravīt ||2||
पश्यैतां पाण्डुपुत्राणामाचार्य महतीं चमूम् ।
व्यूढां द्रुपदपुत्रेण तव शिष्येण धीमता ।। 3।।
Paśhyaitāṁ pāṇḍu-putrāṇām āchārya mahatīṁ chamūm |
Vyūḍhāṁ drupada-putreṇa tava śhiṣhyeṇa dhīmatā ||3||
अत्र शूरा महेष्वासा भीमार्जुनसमा युधि
युयुधानो विराटश्च द्रुपदश्च महारथ: || 4||
Atra śhūrā maheṣhv-āsā bhīmārjuna-samā yudhi |
Yuyudhāno virāṭaśh cha drupadaśh cha mahārathaḥ ||4||
धृष्टकेतुश्चेकितान: काशिराजश्च वीर्यवान् |
पुरुजित्कुन्तिभोजश्च शैब्यश्च नरपुङ्गव: || 5||
Dhṛiṣṭaketuśh chekitānaḥ kāśhirājaśh cha vīryavān |
Purujit kuntibhojaśh cha śhaibyaśh cha nara-puṅgavaḥ ||5||
युधामन्युश्च विक्रान्त उत्तमौजाश्च वीर्यवान् |
सौभद्रो द्रौपदेयाश्च सर्व एव महारथा: || 6||
Yudhāmanyuśh cha vikrānta uttamaujāśh cha vīryavān |
Saubhadro draupadeyāśh cha sarva eva mahārathāḥ ||6||
अस्माकं तु विशिष्टा ये तान्निबोध द्विजोत्तम |
नायका मम सैन्यस्य संज्ञार्थं तान्ब्रवीमि ते || 7||
Asmākaṁ tu viśhiṣhṭā ye tān nibodha dwijottama |
Nāyakā mama sainyasya saṁjñārthaṁ tān bravīmi te ||7||
भवान्भीष्मश्च कर्णश्च कृपश्च समितिञ्जय: |
अश्वत्थामा विकर्णश्च सौमदत्तिस्तथैव च || 8||
Bhavānbhīṣhmaśh cha karṇaśh cha kṛipaśh cha samitiṁjayaḥ |
Aśhvatthāmā vikarṇaśh cha saumadattis tathaiva cha ||8||
अन्ये च बहव: शूरा मदर्थे त्यक्तजीविता: |
नानाशस्त्रप्रहरणा: सर्वे युद्धविशारदा: || 9||
Anye cha bahavaḥ śhūrā madarthe tyaktajīvitāḥ |
Nānā-śhastra-praharaṇāḥ sarve yuddha-viśhāradāḥ ||9||
अपर्याप्तं तदस्माकं बलं भीष्माभिरक्षितम् |
पर्याप्तं त्विदमेतेषां बलं भीमाभिरक्षितम् || 10||
Aparyāptaṁ tadasmākaṁ balaṁ bhīṣhmābhirakṣhitam |
Paryāptaṁ tvidameteṣhāṁ balaṁ bhīmābhirakṣhitam ||10||
अयनेषु च सर्वेषु यथाभागमवस्थिता: |
भीष्ममेवाभिरक्षन्तु भवन्त: सर्व एव हि || 11||
Ayaneṣhu cha sarveṣhu yathā-bhāgamavasthitāḥ |
Bhīṣhmamevābhirakṣhantu bhavantaḥ sarva eva hi ||11||
तस्य सञ्जनयन्हर्षं कुरुवृद्ध: पितामह: |
सिंहनादं विनद्योच्चै: शङ्खं दध्मौ प्रतापवान् || 12||
Tasya sañjanayan harṣhaṁ kuru-vṛiddhaḥ pitāmahaḥ |
Siṁha-nādaṁ vinadyochchaiḥ śhaṅkhaṁ dadhmau pratāpavān ||12||
तत: शङ्खाश्च भेर्यश्च पणवानकगोमुखा: |
सहसैवाभ्यहन्यन्त स शब्दस्तुमुलोऽभवत् || 13||
Tataḥ śhaṅkhāśh cha bheryaśh cha paṇavānaka-gomukhāḥ |
Sahasaivābhyahanyanta sa śhabdastumulo ’bhavat ||13||
तत: श्वेतैर्हयैर्युक्ते महति स्यन्दने स्थितौ |
माधव: पाण्डवश्चैव दिव्यौ शङ्खौ प्रदध्मतु: || 14||
Tataḥ śhvetairhayairyukte mahati syandane sthitau |
Mādhavaḥ pāṇḍavaśh chaiva divyau śhaṅkhau pradaghmatuḥ ||14||
पाञ्चजन्यं हृषीकेशो देवदत्तं धनञ्जय: |
पौण्ड्रं दध्मौ महाशङ्खं भीमकर्मा वृकोदर: || 15||
Pāñchajanyaṁ hṛiṣhīkeśho devadattaṁ dhanañjayaḥ |
Pauṇḍraṁ dadhmau mahā-śhaṅkhaṁ bhīma-karmā vṛikodaraḥ ||15||
अनन्तविजयं राजा कुन्तीपुत्रो युधिष्ठिर: |
नकुल: सहदेवश्च सुघोषमणिपुष्पकौ || 16||
Anantavijayaṁ rājā kuntīputro yudhiṣhṭhiraḥ |
Nakulaḥ sahadevaśh cha sughoṣha-maṇipuṣhpakau ||16||
काश्यश्च परमेष्वास: शिखण्डी च महारथ: |
धृष्टद्युम्नो विराटश्च सात्यकिश्चापराजित: || 17||
Kāśhyaśh cha parameṣhvāsaḥ śhikhaṇḍī cha mahārathaḥ |
Dhṛiṣhṭadyumno virāṭaśh cha sātyakiśh chāparājitaḥ ||17||
द्रुपदो द्रौपदेयाश्च सर्वश: पृथिवीपते |
सौभद्रश्च महाबाहु: शङ्खान्दध्मु: पृथक् पृथक् || 18||
Drupado draupadeyāśh cha sarvaśhaḥ pṛithivī-pate |
Saubhadraśh cha mahā-bāhuḥ śhaṅkhān dadhmuḥ pṛithak-pṛithak ||18||
स घोषो धार्तराष्ट्राणां हृदयानि व्यदारयत् |
नभश्च पृथिवीं चैव तुमुलोऽभ्यनुनादयन् || 19||
Sa ghoṣho dhārtarāṣhṭrāṇāṁ hṛidayāni vyadārayat |
Nabhaśhcha pṛithivīṁ chaiva tumulo ’bhyanunādayan ||19||
अथ व्यवस्थितान्दृष्ट्वा धार्तराष्ट्रान् कपिध्वज: |
प्रवृत्ते शस्त्रसम्पाते धनुरुद्यम्य पाण्डव: ||20||
Atha vyavasthitān dṛiṣhṭvā dhārtarāṣhṭrān kapidhvajaḥ |
Pravṛitte śhastra-sampāte dhanurudyamya pāṇḍavaḥ ||20||
हृषीकेशं तदा वाक्यमिदमाह महीपते |
अर्जुन उवाच |
सेनयोरुभयोर्मध्ये रथं स्थापय मेऽच्युत || 21||
Hṛiṣhīkeśhaṁ tadā vākyam idam āha mahīpate |
Arjuna uvācha |
Senayor ubhayor madhye rathaṁ sthāpaya me ’chyuta ||21||
यावदेतान्निरीक्षेऽहं योद्धुकामानवस्थितान् |
कैर्मया सह योद्धव्यमस्मिन् रणसमुद्यमे || 22||
Yāvad etān nirīkṣhe ’haṁ yoddhu-kāmān avasthitān |
Kair mayā saha yoddhavyam asmin raṇa-samudyame ||22||
योत्स्यमानानवेक्षेऽहं य एतेऽत्र समागता: |
धार्तराष्ट्रस्य दुर्बुद्धेर्युद्धे प्रियचिकीर्षव: || 23||
Yotsyamānān avekṣhe ’haṁ ya ete ’tra samāgatāḥ |
Dhārtarāṣhṭrasya durbuddher yuddhe priya-chikīrṣhavaḥ ||23||
सञ्जय उवाच |
एवमुक्तो हृषीकेशो गुडाकेशेन भारत |
सेनयोरुभयोर्मध्ये स्थापयित्वा रथोत्तमम् || 24||
Sanjaya Uvaacha: Evam uktaḥ hṛṣhīkeṣho guḍākeśhena bhārata |
Senayor ubhayor madhye sthāpayitvā rathottamam ||24||
भीष्मद्रोणप्रमुखत: सर्वेषां च महीक्षिताम् |
उवाच पार्थ पश्यैतान्समवेतान्कुरूनिति || 25||
Bheeshma-droṇa-pramukhataḥ sarveṣhāṁ cha mahīkṣhitām |
Uvācha pārtha paśhyaitān samavetān kurūn iti ||25||
तत्रापश्यत्स्थितान् पार्थ: पितृ नथ पितामहान् |
आचार्यान्मातुलान्भ्रातृ न्पुत्रान्पौत्रान्सखींस्तथा || 26||
Tatrāpaśhyat sthitān pārthaḥ pitṝn atha pitāmahān |
Āchāryān mātulān bhrātṝn putrān pautrān sakhīṁs tathā ||26||
श्वशुरान्सुहृदश्चैव सेनयोरुभयोरपि |
तान्समीक्ष्य स कौन्तेय: सर्वान्बन्धूनवस्थितान् || 27||
Śhvaśhurān suhṛidaśh chaiva senayor ubhayor api |
Tān samīkṣhya sa kaunteyaḥ sarvān bandhūn avasthitān ||27||
कृपया परयाविष्टो विषीदन्निदमब्रवीत् |
अर्जुन उवाच |
दृष्ट्वेमं स्वजनं कृष्ण युयुत्सुं समुपस्थितम् || 28||
Kṛipayā parayāviṣhṭo viṣhīdann idam abravīt |
Arjuna uvācha |
Dṛiṣṭvemaṁ sva-janaṁ kṛiṣhṇa yuyutsuṁ samupasthitam ||28||
सीदन्ति मम गात्राणि मुखं च परिशुष्यति |
वेपथुश्च शरीरे मे रोमहर्षश्च जायते || 29||
Sīdanti mama gātrāṇi mukhaṁ cha pariśhuṣhyati |
Vepathuśh cha śharīre me roma-harṣhaśh cha jāyate ||29||
गाण्डीवं स्रंसते हस्तात्त्वक्चै व परिदह्यते |
न च शक्नोम्यवस्थातुं भ्रमतीव च मे मन: || 30||
Gāṇḍīvaṁ sraṁsate hastāt tvak chaiva paridahyate |
Na cha śhaknomy avasthātuṁ bhramatīva cha me manaḥ ||30||
निमित्तानि च पश्यामि विपरीतानि केशव |
न च श्रेयोऽनुपश्यामि हत्वा स्वजनमाहवे || 31||
Nimittāni cha paśhyāmi viparītāni keśhava |
Na cha śhreyo ’nupaśhyāmi hatvā sva-janam āhave ||31||
न काङ्क्षे विजयं कृष्ण न च राज्यं सुखानि च |
किं नो राज्येन गोविन्द किं भोगैर्जीवितेन वा || 32||
Na kāṅkṣhe vijayaṁ kṛiṣhṇa na cha rājyaṁ sukhāni cha |
Kiṁ no rājyena govinda kiṁ bhogair jīvitena vā ||32||
येषामर्थे काङ्क्षितं नो राज्यं भोगा: सुखानि च |
त इमेऽवस्थिता युद्धे प्राणांस्त्यक्त्वा धनानि च || 33||
Yeṣhām arthe kāṅkṣhitaṁ no rājyaṁ bhogāḥ sukhāni cha |
Ta ime ’vasthitā yuddhe prāṇāṁs tyaktvā dhanāni cha ||33||
आचार्या: पितर: पुत्रास्तथैव च पितामहा: |
मातुला: श्वशुरा: पौत्रा: श्याला: सम्बन्धिनस्तथा || 34||
Āchāryāḥ pitaraḥ putrās tathaiva cha pitāmahāḥ |
Mātulāḥ śhvaśhurāḥ pautrāḥ śhyālāḥ sambandhinas tathā ||34||
एतान्न हन्तुमिच्छामि घ्नतोऽपि मधुसूदन |
अपि त्रैलोक्यराज्यस्य हेतो: किं नु महीकृते || 35||
Etān na hantum ichchhāmi ghnato ’pi madhusūdana |
Api trailokya-rājyasya hetoḥ kiṁ nu mahī-kṛite ||35||
निहत्य धार्तराष्ट्रान्न: का प्रीति: स्याज्जनार्दन |
पापमेवाश्रयेदस्मान्हत्वैतानाततायिन: || 36 ||
Nihatya dhārtarāṣhṭrān naḥ kā prītiḥ syāj janārdana |
Pāpam evāśhrayed asmān hatvaitān ātatāyinaḥ ||36||
तस्मान्नार्हा वयं हन्तुं धार्तराष्ट्रान्स्वबान्धवान् |
स्वजनं हि कथं हत्वा सुखिन: स्याम माधव || 37||
Tasmān nārhā vayaṁ hantuṁ dhārtarāṣhṭrān sva-bāndhavān |
Sva-janaṁ hi kathaṁ hatvā sukhinaḥ syāma mādhava ||37||
यद्यप्येते न पश्यन्ति लोभोपहतचेतस: |
कुलक्षयकृतं दोषं मित्रद्रोहे च पातकम् || 38||
Yady apy ete na paśhyanti lobhopahata-chetasaḥ |
Kula-kṣhaya-kṛitaṁ doṣhaṁ mitra-drohe cha pātakam ||38||
कथं न ज्ञेयमस्माभि: पापादस्मान्निवर्तितुम् |
कुलक्षयकृतं दोषं प्रपश्यद्भिर्जनार्दन || 39||
Kathaṁ na jñeyam asmābhiḥ pāpād asmān nivartitum |
Kula-kṣhaya-kṛitaṁ doṣhaṁ prapaśhyadbhir janārdana ||39||
कुलक्षये प्रणश्यन्ति कुलधर्मा: सनातना: |
धर्मे नष्टे कुलं कृत्स्नमधर्मोऽभिभवत्युत || 40||
Kula-kṣhaye praṇaśhyanti kula-dharmāḥ sanātanāḥ |
Dharme naṣhṭe kulaṁ kṛitsnam adharmo ’bhibhavaty uta ||40||
अधर्माभिभवात्कृष्ण प्रदुष्यन्ति कुलस्त्रिय: |
स्त्रीषु दुष्टासु वार्ष्णेय जायते वर्णसङ्कर: || 41||
Adharmābhibhavāt kṛiṣhṇa praduṣhyanti kula-striyaḥ |
Strīṣhu duṣhṭāsu vārṣhṇeya jāyate varṇa-saṅkaraḥ ||41||
सङ्करो नरकायैव कुलघ्नानां कुलस्य च |
पतन्ति पितरो ह्येषां लुप्तपिण्डोदकक्रिया: || 42||
Saṅkaro narakāyaiva kula-ghnānāṁ kulasya cha |
Patanti pitaro hy eṣhāṁ lupta-piṇḍodaka-kriyāḥ ||42||
दोषैरेतै: कुलघ्नानां वर्णसङ्करकारकै: |
उत्साद्यन्ते जातिधर्मा: कुलधर्माश्च शाश्वता: || 43||
Doṣhair etaiḥ kula-ghnānāṁ varṇa-saṅkara-kārakaiḥ |
Utsādyante jāti-dharmāḥ kula-dharmāśh cha śhāśhvatāḥ ||43||
उत्सन्नकुलधर्माणां मनुष्याणां जनार्दन |
नरकेऽनियतं वासो भवतीत्यनुशुश्रुम || 44||
Utsanna-kula-dharmāṇāṁ manuṣhyāṇāṁ janārdana |
Narake ’niyataṁ vāso bhavatīty anuśhuśhruma ||44||
अहो बत महत्पापं कर्तुं व्यवसिता वयम् |
यद्राज्यसुखलोभेन हन्तुं स्वजनमुद्यता: || 45||
Aho bata mahat-pāpaṁ kartuṁ vyavasitā vayam |
Yad rājya-sukha-lobhena hantuṁ sva-janam udyatāḥ ||45||
यदि मामप्रतीकारमशस्त्रं शस्त्रपाणय: |
धार्तराष्ट्रा रणे हन्युस्तन्मे क्षेमतरं भवेत् || 46||
Yadi mām apratīkāram aśhastraṁ śhastra-pāṇayaḥ |
Dhārtarāṣhṭrā raṇe hanyus tan me kṣhemataraṁ bhavet ||46||
सञ्जय उवाच |
एवमुक्त्वार्जुन: सङ्ख्ये रथोपस्थ उपाविशत् |
विसृज्य सशरं चापं शोकसंविग्नमानस: || 47||
Sanjaya Uvaacha: Evam uktvārjunaḥ saṅkhye rathopastha upāviśhat |
Visṛijya sa-śharaṁ chāpaṁ śhoka-saṁvigna-mānasaḥ ||47||
Leave a Reply